Gerrit Brand is as post-doktorale genoot verbonde aan die Departement Filosofie aan die Universiteit Stellenbosch. In dié hoedanigheid doen hy tans navorsing oor filosofie en taalpolitiek. Sy eerste boek Speaking of a Fabulous Ghost: In Search of Theological Criteria, with Special Reference to the Debate on Salvation in African Christian Theology het in 2002 by die Frankfurtse uitgewer Peter Lang verskyn. Hy het teologie en filosofie studeer aan die Universiteit van Pretoria en die Universiteit Utrecht en ook navorsing gedoen oor die apologetiek van CS Lewis en waarheid en objektiwiteit in die teologie-as-wetenskap. Hy het verder kerklike en onderwysfunksies vervul, onder andere in Thohoyandou in Limpopo, en is aktief in die Taalsekretariaat en die Meertaligheidsaksiegroep. Hy vertaal gereeld akademiese tekste en skryf artikels vir vaktydskrifte en die populêre pers. Hy is getroud met Lucia en hulle het twee seuns, Simon en Arend. Murray Hofmeyr (gebore in 1958) is die man van Lientjie (Smith) en die pa van Andrew, Heleen en Joanie. Hy doseer Filosofie (sedert 2000) en Godsdienskunde (sedert 1989) aan die Universiteit van Venda vir Wetenskap en Tegnologie. Hy is ook ’n tentmakerpredikant in die Tshilidzini-gemeente van die Verenigende Gereformeerde Kerk. As medestigter van die Southern African Student Volunteers (SASVO) is hy betrokke by gemeenskapsontwikkeling. Sy teologiese doktorsgraad het hy verwerf met ’n proefskrif getiteld ’n Teologie van die Verlange. Concupiscentia in die Politieke Teologie van Johann Baptist Metz. Om in sy kajak te wees, is een van sy gunsteling aktiwiteite. Die ander is bergfietsry en verkenningstogte in die Soutpansberg met sy tuisgeboude jeep. Akademies stel hy veral belang in die dialoog tussen Afrika en die Weste, ontwikkelingsteorie, en die geskiedenis en sosiologie van idees.

to the top