’n bom op die markplein: irak 2003

Vincent Oliphant

die mark was al van oertyd af
die aardmoeder van die armes
en die ellendiges van bagdad
die heilige stad met die hart
so vol legendes

elke dag het sy gewag
in haar kombuis vol speserye
breekware en kruie

elke dag haar arms oopgegooi
haar kinders uitgenooi
om haar tooisel te behang
met stemme vol stories
van seerkry en van lag

elke dag het hierdie vrou
die son in haar hand gehou

sy was die bron
van hoop waar die verlooptes
’n stuk geluk kon koop

toe raak haar oë bewoë
van wense en van bedes
vir die vrede

vroeër se gerugte
het gestaar
uit swart en strak berigte

toe slaan die uur
dat die sand oor haar kom skuur:
jy móét jou kinders huis toe stuur!

maar die knop was reeds gedruk

haar hart is uitgeruk

boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.