insig in die vlees

Henk Havenga

Joan Osborne se oë is deursigtig groen
haar lippe tartend vol. ’n ringetjie
deur die neusvleuel kring parmantig.
’n man loop op sy hande.
’n engel verskyn in wit.
what if God was one of us?
wonder sy en ek via MTV verlief
op haar goddelike blonde vel.

CNN bombardeer ons met Bush
Saddam en Tony Blair. luister!
is dit die stem van Bin Laden live on air?
in bagdad leer ’n seun leef sonder hande.
in gaza tussen talle mense
vaar ’n man op na sy paradys
in ’n donderende rooi wolk.
daar is oorlog in die voorhuis.
daar is oorlog in die lug.

met die druk van ’n knoppie
sing joan weer oor God.
haar oë is steeds deursigtig groen
haar lippe tartend vol.
’n man loop op sy hande.
’n engel verskyn in wit.
what if God was one of us?
wonder sy en ek met afgryslike insig
in ons verganklike goddelike vlees

boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.