Aachen*

Diana Ferrus

Pragtige stad op die Duitse grens,
met oerou geboue en stories wat leef -
hoekom juis nou
ontdek ek jou?
Hoekom juis nou
lees ek van jou?
Jy was vereer en mooi geveer,
toe vertrap en later gelap -
en hy, teen sy wil
kom bly by jou
vir drie jaar en ses
van sy langste maande!
Hoekom juis nou
ontdek ek jou?

Die vyand vir jou
maar die redders vir hom -
hulle kom oor die grens en ruk jou siel,
het met rollende tenke jou skoonheid verniel.
Daar was hoop in sy hart
en vrees in jou gees
maar teen die einde van maande
was nie jy of hy staande!

Hy het jou verlaat
want hy was vry -
jy’t met jou storie agtergebly
maar hy’t nog steeds,
soos jy,
gely.

Aachen,
pragtige stad op die Duitse grens -
oeroue geboue en stories wat leef,
hoekom juis nou
ontdek ek jou?

25.10.2001

* Gedagtes ná die ontdekking dat Aachen die eerste Duitse stad was wat die Geallieerde magte binnegeval het gedurende die Tweede Wêreldoorlog

boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.