Die Taalsekretariaat

Die Taalsekretariaat Doelstelling

Databasis
’n Uitgebreide databasis ten opsigte van individue en organisasies wat by Afrikaans betrokke is, word onderhou. Deur gebruik te maak van die inligting in die databasis kan gebruikers per pos, faks en e-pos inligting bekom en kommunikeer met enige sodanige individu of organisasie in Suid-Afrika en internasionaal. Die diens is teen ’n nominale fooi beskikbaar.

Regsinligting
’n Omvangryke regsverwysingsraamwerk word tans voorberei. Aan die hand hiervan kan gebruikers inligting verkry aangaande alle taalverwante statutêre bepalings in die Grondwet, konstitusionele instellings soos die Menseregtekommissie, Pansat, asook arbeidswetgewing. Die daarstelling van ’n inligtingsraamwerk waarbinne alle hofuitsprake met betrekking tot uitsprake oor taalregte hanteer word, word tans onderneem.

Taalverwerwingsinisiatiewe
’n Taallaboratorium aan die Universiteit Wes-Kaapland is ingerig met die mees moderne apparatuur en metodologie waardeur swart studente ’n kursus in Afrikaans verwerf as deel van ’n graadkursus.

Taalbemagtigingsinisiatiewe gerig op die onderwys
In samewerking met die Iilwimi-sentrum vir Veeltaligheid en die Taalprofessies aan die Universiteit van Wes-Kaapland word taalbemagtigingsprojekte onderneem. Die eerste loodsprojek bestaan uit vyf skole waar alle leermateriaal in Xhosa, Afrikaans en Engels vertaal word om sodoende voorsiening te maak dat elke kind binne ’n veeltalige klassituasie, in sy moedertaal onderrig word.

Die leerders ondergaan intensiewe opleiding volgens wetenskaplik beproefde metodologieë om ’n veeltalige onderwysomgewing te hanteer.

Die aanleer van swart inheemse tale
Samesprekinge met provinsiale onderwysowerhede is geskeduleer om voorbereidings te tref vir die verpligte instelling van ’n swart inheemse taal by tradisoneel wit skole as verpligte derde taal in die skoolleerplan.

Konstitusionele instellings vir die monitering van taalregte
Samesprekinge word met die Pansat-raad gevoer om die gebreke in die Pansat-wetgewing te identifiseer. Regsadvies word ingewin om te bepaal tot welke mate die Pansat-wetgewing aangepas moet word om die taalmoniteringsfunksie te volvoer soos deur die Grondwet bepaal.

Pansat het self ook breë taalbewusmakingsfunksies wat op hierdie stadium egter nog baie dormant is.

Pogings word aangewend om die taalbewusmakingsfunksies te aktiveer.