I-MAG IPHEFUMLA KWINDLELA ABONA NGAYO UMPHATHISWA NGEMFUNDO YOLWIMI LWENKOBE (INTETHO YOHLAHLO LWABIWO-MALI EPALAMENTE, 21 JUNI 2004)

Thina, malungu oMbutho weeLwimi eziNinzi, sinqwenela ukuvakalisa inkxalabo yethu nodano yintetho yakutshanje yohlahlowabiwo-mali kaMphathiswa Pandor ePalamente, apho athe wabhengeza inkxaso yeSebe lakhe kwinkqubo yangoku yokuvumela kuphela iminyaka emithathu yemfundo mgolwimi lweenkobe phambi kokuba kuguqukelwe kwisiNgesi njengolwimi lokufundisa kwiBanga 4. Yile nkqubo ekufuneka ithabathe uxanduva lokugxekwa ngokungaphumeleli kwezemfundo kwanokuyeka phakathi kwabafundi ezikolweni nakumaziko ephakamileyo ezemfundo okwenzeka ikakhulu kubantu abathetha iilwimi zesiNtu. Ubugcisa babantwana bezengqondo nobolwimi kulwimi lwabo lweenkobe bufuna ixesha elide kuneminyaka emithathu yokuphuhla ngokupheleleyo phambi kokuba izakhono ezinjalo zibe nakho ukukhutshelwa kulwimi lwesibini.

Uphando olwenziwe eMzantsi Afrika nakwamanye amazwe lubonisa ukuba imfundo ngolwimi lwenkobe iba nempumelelo ebonakalayo kunaleyo yesiNgesi apho ootitshala ingelolwimi lwabo isiNgesi. Oku kuyichaphazela kakhulu imfundo yamabanga asezantsi apho abafundi nootitshala bathetha iilwimi zesiNtu. Uphando lukaProbyn (2001) olwenziwe kwizikolo ezisezilokishini luveza ukuba ukufundisa ngesiNgesi kuyabacinezela ootitshala nabantwana kubangele uxinzelelo olumandla kuba ootitshala bafundisa ngolwimi olungelolwabo nabantwana kufuneka bazame ukunxibelelana nootitshala ngolwimi olungelolwabo, nto leyo ebenza bangakhululeki. Oku kuneziphumo ezibi ekufundeni yaye kuyichaphazela ngqo imfundo yabafundi. Ixesha elininzi ootitshala balichitha becacisa intsingiselo yamagama esiNgesi endaweni yokuba babe bafundisa isifundo abafanele ukuba bayasifundisa! Yiloo nto singothuki ncam ukuba sinento ngoku uKathleen Heugh (2004) ayibiza ngokuba yi-"two-tiered" education system, inkqubo yemfundo enamanqanaba amabini, apho amalungelo omgaqo-siseko angundoqo nenzuzo kwimfundo zixhanyulwa ngabantetho isisiNgesi nesiBhulu, ze abo bathetha iilwimi zesiNtu bashiywe ngaphandle.

Abafundi banakho ukusithetha basikhuphe ngeempumlo isiNgesi besifunde kuphela njengesifundo (NEPI, 1992). I-I-MAG iyavumelana nokuba makuchithwe imali eninzi ekuqeqesheni ootitshala abaphume izandla kwisiNgesi, yaye icela uMphathiswa ukuba enze kwale nto ifanayo nakwezinye iilwimi ezisemthethweni. Kodwa ke, sikholelwa ukuba imfundo esemgangathweni apho kufundiswa ngolwimi lwenkobe yinto enokwenzeka endaweni yale yenziwayo ngoku yokufundisa abantwana ngesiNgesi engenaziphumo zincumisayo. Sicela ukuba uMphathiswa akhe aphinde ayiqwalasele indlela awubona ngayo lo mba, endaweni yokuba aphinde iimpazamo zexesha elidlulileyo ezithe zabenza abantwana bethu ukuba bangaziphumeleli izifundo yaye bangafumani nemisebenzi.

Imithombo
Heugh, Kathleen 2004. To what extent does the Revised National Curriculum Statement accommodate the Language-in-education policy and constitutional obligations of equal access and non-discrimination with regard to language? Paper presented at a conference entitled Continued Quality Education - The Road Ahead. University of the Western Cape, 4-5 June 2004.

NEPI 1992. Language. Cape Town: National Educational Coordinating Committee and Oxford University Press.

Probyn, Margie 2001. Voice from South African Classrooms. Paper presented at the Third International Symposium on Bilingualism, Bristol, April 2001.

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.