Sê die skrywer vir die terapeut

Madri Victor

(vir dr J)

Sê die skrywer:
só maklik moet verlossing wees!
My woorde is ’n ongebore lam
in die vlesige baarmoeder van my mond,
verwek in sluwe tendrils van die brein,
onwillig,
maar om jou ontwil
lê ek my weekliks voor jou neer
op die altaar van papier
op die altaar van jou geduld
laat ek die veilige vrugwater agter
in struweling van slym en bloed.

Sê die terapeut:
só is jy gemaak
en dit is goed.

Sê die skrywer:
só maklik moet verlossing wees;
want jy waak oor my
en pas my woorde op,
jy versamel elke een in die kraal
van jou bruin pasiëntelêer.
Jy is die vader aan wie ek bieg,
die moeder wat besorgd uitvra,
jy is die redder van drome,
die inkeerder, die oppasser,
en een-oog-koning.

Sê die terapeut:
beter om die woorde,
klein, wit nat-neus woorde,
in te keer, te probeer beheer
as om dit te moet soek.

Sê die skrywer:
só maklik moet verlossing wees!
As vader van verstotenes
sal jy tog moet verstaan
dat elke lam ’n offer is
vir Eensaamheid
daardie god wat so verveeld
sy dop ontydig drink
en saam met Verlies en Dood
’n glasie op my klink.
Verstaan dan as ek sê
só maklik moet verlossing wees
soos om my woorde
een vir een voor jou te slag.

Sê die terapeut:
ons maak goeie vordering.
Volgende week: ’selfde uur, ’selfde dag?

LitNet: 8 Augustus 2006

Klik hier en sluit aan by ons nuusbrieflys vir jou weeklikse dosis oemf! Klik hier om die nuutste nuusbrief te sien

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.