wagtyd

Adolph van Coller

te veel
dolende dae
van dié jaar
was ons
(natuurlik slegs
in afstand)
te ver van mekaar

skenk my
die gidse van
jou vingertoppe
boomryke voetpaaie
wat op eie ingewing
kortpaaie kies
na jou koeltes
en heuning
daarom

seën my
met minder
en nog minder blou
en heelparty meer van
die sirkelvlug
van die om en om
van die sirkelvlug
van jou
daarom

wag my in beminde
amper soos herfs
wat haarself so
half hoedloos benader
wag my in my lyf
sonder begrip vir
die duur van tyd
sonder ’n waardering
van die onvergeeflikheid
van afstand
en van oomblikke
al wat ek wil is ’n happie
van jou vuur
daarom

ek het jou
gewoond geraak
jy is my
diepe gebondenheid
my alleenheid vind
volrondheid in
die vlug van voëls
wat skemer vermy
ek is volbring
en volstaan
met nog ’n maer gebed

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.