Ou liefde

Lee van Wyk

sy is jou ooitjie
die een wat nou vye op haar heupe dra
die een met die klokborsies
en die kolletjie bruin wol tussen haar bene
wat nou al meer rustig op die stoep sit
met hande stil gevou in die lende
soos knopperige wingerdstokke ná snoeityd
die leerbruin skouers toe onder tjalie of jas
die wisteria-oë trek reeds lang skadu’s huis toe

en jy is haar rammetjie
eens muskerig, uitkop, oorhoeps en braaf
nou stil en grys om die bek, die knieë styf, reeds vorentoe gekantel
die tande stomp van ou bene kou
en die neutbruin stem wat roep “Nooi!”
van die werf tot by die wastafel
nou net ’n rimpeling in die middag se koppie tee

jy is sy ooitjie
hy is steeds jou rammetjie
wanneer jou wingerdstokvingers grond soek op sy been
wanneer jou gerekte lyf aanleun teen sy hoenderbors
wanneer sy arm bessieboswilg om jou krul
en julle woordeloos aanstap hek toe, huis toe
in die laatskemer van die herfstyd se weityd

Februarie 2001

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.