strandtoneel

Piet van Rooyen

alle stasies alle stasies
dis die maritieme radio
die plaaslike bevolking rapporteer
eindelose dae van manjifieke weer
en daarby kan ek in my eie onkunde
en goedgelowigheid help sweer

buitekant die baai
lê volgelaaide skepe
soos lui en dikgevrete beeste
herkouend en dom
op seestrome en wieg

die see is ’n blink vlak
water waarop die son
in duisende skadeloos
sy klein kartetse breek

my oë soek agterdogtig na beduidenis
van môre of oormôre se storm en wind
maar ek gee die horison
net ’n baie vlugtige veeg
want ek is reeds gewaarsku as kind
en weet staring in so ’n son
en glinstering in maak blind

in die windstil arms van die baai
lê sonnige klein katryn
die begeerte van my lende
die gesalfde van my oog
bruin lenig en perfek
op haar oopgespreide
kwaliteit koelwit handdoek

ek die bedrewe sportman
dra met wye elmboë
met kuite en opgerolde broekspype
twee druppende torinkies roomys
gedwee aan oor swets-warm sand

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.