Encore

Rean Steenkamp

Haar oë is oop.
Sy staar voor haar uit
— en sien ons nie.
Sy kyk ’n ander tyd in
toe daar vir haar nog hoop en liefde was
toe haar vlam nog ’n vreugdevuur was.
Haar vel is ’n perkament
wat los hang om die skedel,
los soos haar greep op die lewe.
Redeloos veg haar lyf nog voort
al wil sy lankal nie meer wen nie.
Na elke neerlaag verdeel die selle weer
en rig uit gewoonte nog ’n keer die weefsel op.
Maar dan kom Tyd en
skud weer aan die beendere
om haar uit die tronk van
vervalle vlees te ruk.
Soms daal sy weer vlugtig
op die ashoop neer,
vryf sy die wasem weg aan die binneruite van haar oë ...
Dan dwaal sy weer voort
en bly net die soma as toegif
vir haar kinders en hul kinders
op die staalbed oor.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.