Gedeeltelike sonsverduistering

Hans Pienaar

Ou man hou wag onder die oneerlikheid
van neon, omring deur skimpe van vals
staal, die stukkende ruitveër van sy das,
pligsgetrou soos die voorportaal, beloer
hy die rye skerms oor sy beker se rand,
volstaan met getuienisse en gerugte:

In 'n voorwinterse kou
verduister die son homself
in die geglasuurde gebou

onskuldig soos 'n teesakkie, dog so afgerig
soos 'n geskaliede ketel, weet hy: die ritsel
van foelie eggo die oergesuis wat alle
oorspronge bedek, alle ore laat spits,
om te hoor wie sluip in die gange, wie
druk aan die geute en wie hou asems op:

soos 'n rower op 'n drafstap
verskuif die son oor sy gesig
die maan al verder af: oogklap

die vernuf van verneukery lê in gereedheid
vir die oomblik, wat kan opduik enige tyd,
ondanks die sekere verloop van prosedures
en voorbehoedtegnieke: so slu soos spieëls
in hoeke, moet jy dus wag om te kan terugslaan,
gewoond aan eensaamheid en op jou hoede

die son steel sy eie skaduwee
wat verflou en vergrys
soos hare van 'n weduwee

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.