brussel

Sandra Nortje

ons het ’n kaart gekoop
maar dit was nie nodig nie
die grote mark is altyd sentraal
toe het ons daarheen geloop
ek het probeer om liggies
oor die kinderhofies te gaan
maar dit was moeilik
my skoensole was hard
en soms is mens net te moeg
vir gewigloosheid
al wat lewe was op die mark
bier het onder wit tentkappe gevloei
in alle tale is gelag
ons het by ’n tafeltjie gaan sit
en koffie bestel
in die deurkosyn het god
met skrefiesoë en ’n hangsnor
en ’n voorskoot aan
na sy babelse skepsels gekyk
en af en toe na hulle omgesien
meestal het hy hulle laat begaan
ure en baie koppies koffie later
het hy nog getrou die wag gehou
maar ons moes gaan

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.