Carl Mischke

Geheime geskrif

Ek ry sestig kilometer
om ’n tikmasjien te koop
want my muse is erg ouderwets:
sy verpersoonlik tegnofobie
en verafsku die sagte suis
van rekenaar en hardeskyf,
die sis en spoel van die laser drukker straal;
skugter swyg sy in die monitor se lig
en kwyn in die doolhof van draad.
Steeds verkies sy die gekletter
van verwoording, die hoor-en-sien geraas
van gryp na elke letter,
elke komma, punt.

Maar my muse is ook
’n onvoorspelbare teef,
deeltyds en op tyddeel:
soms lê sy voor die televisie en slaap
en soms gaan neuk sy rond
aan die weskus of innie kaap
- om na drie weke terug te keer,
bruingebrand en sat gesuip,
onkeerbaar en astrant
sleep sy stoel nader en dikteer
reël op reël: skelm sinne in geheim
agter my kantoor se geslote deur.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.