Carl Mischke

Ritueel

Vroeg vanoggend
het ’n vragvliegtuig laag
oor die stad gedaal.
Maar my gedagtes was elders
en my ore dig teen die gedreun.

Hoe oud is hierdie manuskrip?
Vlieg oorsee en terug en trek
van huis tot huis, word ingepak,
uit agtelosigheid diskette gewis,
gebreek, verloor, vergetelheid.
Hoe bleek is nou die ink,
selfs eertydse tegnologie
se aanspraak op die ewigheid
oorskry, nie bestand
teen afskeep op verganklikheid.
Slegs aanduidings oorgelewer, pligsgetrou
gestuur, vertrek, strategie van vlug,
van sestien jaar se stof
en ontwyk, versteek, onthou.

Vroeg vanoggend
het ek tot verhaal gekom.
Deur die duister nuushooftrekke,
onrusbarende wisselkoers,
die weervooruitsig egter positief.
Maar vasgevang in die knoopverloop
van my onvermoë se narratief,
is my stem steeds stom,
my oë half-toe, ligsensitief.

En weerbarstig steeds:
subtiele subteks, onderdruk,
nou reeds amper onbewus,
’n skynsel wat fluister en dartel
om die grense, selfs deurgevleg
in my amptelike diskoers
oor die suid-afrikaanse arbeidsreg.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.