Onder die maroela*

Johann Lodewyk Marais

Onder die maroela staan ek en praat
oor die damprojek in die Lomati.
Oriënteer die mense wat om my
saam met die induna en sy raadslede
op hierdie Sondagmôre vergader.
Wys op die kaart oos en wes, noord en suid.
Wys die toegangspaaie, die leengroewe,
die damwal, die werkers se kwartiere
en vertel hoe die water oor vyf jaar
oor hulle huise en landerye
en weivelde wyd en oop gaan uitklad.
Ek praat en praat oor die Matsamo-stam
se grond en die nuwe suikermeule,
die besproeiingskema, die werk, die geld -
al die ontwikkelaar se beloftes.
Die kleinboere en kleihuiseienaars
sit soos ’n gemeente stil en luister
toe die langasempie soos ’n engel
uit ’n lappie mielies aangevlieg kom
en woeps op die ingenieurskaart neerplak.
Maar my tolk het hom vinnig afgeklap
en onder sy Adidas doodgetrap.

*Hierdie gedig kom uit ’n digbundel Plaaslike kennis wat gedurende 2003 by Protea Boekhuis verskyn.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.