Kokospalm

Johann Lodewyk Marais

Die werking
van die palmboom
ontgaan die kus:
die sliertige takke
se lydsame groei,
haar kromrug trek
teen tropiese buie
en die elastisiteit
van die skraal stam
— op en op
teen die blou, blou lug —
se groeiende weerstand.
Dat ’n boom so kan kophou!
O boom wat saamspeel
met die wind en die weer
waaraan jy jou aandag wy:
wind wat jou uitlok
om te dans en te swaai,
jou onsigbare besoeker
waaraan jy vorm gee.
Weer en weer.
Selfvoldane boom
wat vrugte oorvloedig
in die waai
van jou takke dra,
jy volvoer
die spel van meelewing
en boots jou soort
al langs dié kus
soortlik na.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.