nuwejaar

Elza Lorenz

’n jaar oue babelas hang slap ballon
onder gister se vleklose hemel;
voëls is plesierig in die blinkblaarboom
en die voorstad droomloos stil.
op die snelweg snel daar niemand nie
hoewel ’n dowwe boeing
ver in die geheue dreun
as ek voete teen mekaar skuur
om ’n vryerige droom
dig teen die been te onthou;

onthou, sy met die kanker
lewe nog, meestal duiselig
tussen alzie’s wat ronddwaal
by ’n sydeur en paadjie langs,
maar slaap genadiglik baie.

die kind sal netnou kom,
vars gekwas in haar drastoeltjie
en in sagte velletjie toegedraai,
met ’n tandlose wye present
om spilpunt te wees
van die kringetjie groen vreugde
simmetries op ons piekniekkombers,
so groot moontlik oopgegooi
op koeltegras onder die blinkblaarboom:
      eiland in die klip-en-son.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.