Elzabe Kritzinger

Rooi aarde

My suster loop met blomvoete op die rooi rooi grond van Afrika
sy’s bandeloos, vreugdeloos, harteloos en moedeloos
by ’n wit kers in ’n skemer katedraal
omarm sy my met gebaretaal
Soldate dra my jongste kind deur ’n week van sewe dae
hy’s bandeloos, vreugdeloos, harteloos en roekeloos
langs ’n landmyn in ’n skemer katedraal
omarm hy my met gebaretaal

Kan jy onthou
Windhoekbier en vanilla-roomys
op die warm Tsumeb-nagte
    — sjuut, sê dit sagter —
alles wat ek ooit geleer het, gedroom het, verstaan het
word films
en loop voor my oë verby
    — om saggies te bely —
o die hartseer rooi aarde

Ek loop op glas en warm rooi grond in die oorlog wat Afrika stukkend skeur
ek’s bandeloos, vreugdeloos, harteloos en liefdeloos
by mense wat hurk in ’n skemer katedraal
is trane ’n universele taal

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.