My jeug

Joan Hambidge

So keer ek terug
na my ouerhuis
wat nie meer bestaan nie.
My ouers het getrek
na ’n meenthuis
in ’n ander buurt
binne loopafstand van die kerk
en dorp met ’n biblioteek
en groot fontein.
Daar is ’n monument
vir die Boereoorlog
en hier het Smuts
ook sy setel verloor.
Ek loop deur die nuwe huis
besigtig alles voetjie-vir-voetjie:
’n engel wat harp speel
voor die hemelpoorte;
die Bybel-in-kalfsleer;
’n skildery
wat iets uitblaker
van “haelwit-gestapelde-wolke”
en vele boeke oor die politiek
van Verwoerd en Malan.
Die wysvinger van P.W.
ook hier verewig.
In hul nuwe huis
staan al die oorblyfsels,
memento’s
van my opgefokte jeug

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.