Om jou vraag te beantwoord

Joan Hambidge

Altyd buite,
uit pas, in misverstand,
in iemand se swart boekies.
Nie genooi nie. Oorgesien.
Verlaat. Geïgnoreer.
Beskuldigde. Verinneweerde.
Soos ’n onbegryplike wiskunde-formule.
’n Swartbord vol hiërogliewe.

Daardie bottel vol kristalle
in die biologieklas. ’n Latyn-handboek
vol verbuigings en vervoegings.
Die storie van Paul Gallico se
Snow goose. The new kid on
the block. Patches on the elbows

maar die hart oop soos ’n Olimpiese swembad
waarin iemand verdrink. Die toeskouer.
Die ge-crushde (verkeerde keuse).

Toe oorprestasie die wapen. Om in stilte
’n ander simboletaal te bemeester:
“die verlange passer vannag in my ...”
dig ek, griffend met
’n verlore passer in ’n meetkundeboek.

’n Lewenslange wete vir die hartlandskap
van kleins af nie opgewasse of uitgeknip.

So ’n kind was ek.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.