Hiroshima mon amour

Joan Hambidge

Vroeër kon ek op ’n reis na ’n verre land
in vele verse uitbloei soos ’n kersieboord in Kyoto:
rooi swoel vrugte in oordaad.

Verloor egter my pen in Hiroshima
boonop ’n silwer een met my naam daarop gegraveer
iewers tussen 5 of 6 nm, ek meen, op die 17e Januarie
in die Vredepark. My naam, my naam is soek …

Elke jaar op 6 Augustus
sien begenadigdes dooies astraal ronddwaal.
Ruïnes staangemaak deur herinnering kom tot lewe.
Alles word soos dit was; asof ’n goddelike herspeel-knoppie gedruk.
Dan raas die fietsie van Shinichi Tetsutani deur die tuin en jy sien
Sadaki Sasaki vlieërs bou. Alle glasskerwe word skrynende ligte en      ‘n
foto van beton ’n lewende man. Alle swelsels sak soos mis voor ‘n
hoopvolle son. Vliegtuie is weer net vervoermiddele en uraan ’n      blote
simbool op die chemietabel.

Alle verlore penne kry dan lewe
in eensgesindheid grif hulle in onuitwisbare ink hierdie woorde:
laat ons nooit, maar nooit vergeet
dat ’n eenmalige negatiewe daad
blywend, meervuldig, letsels dra.

O Hiroshima, geliefde stad
vir jou moes ek my pen verloor.
O Hiroshima, geskryfde stad
in jou is vele lewens graveer.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.