By die opruiming van my kantoor

Joan Hambidge

Om jou lewe te liasseer
in donkerbruin bokse
- gemerk met ’n swart koki -
het funeste gevolge vir die digter.
’n Letterkundige museum in die kleine.
Wie was HP wat vra vir inligting
of SS wat hou van ’n vergete vers?
’n Vaagweg bekende handskrif roep
ongekende pyn (en mislukking) op
en ’n universiteitsblad kla oor verkragting
en drankmisbruik. Sanlam-polisse, uitkeerannuïteite
en vele beleggings stapel op saam met poskaarte
uit die vreemd-bekende, liefdesverklarings, gelukwensings
en ’n hele gerf dokumente rondom ’n boek oor liefdesverraad.
Eksamenskrifte bewaar ’n rooi oordeel oor ’n lewe.
Hoe lyk die mens wat haar hier in ’n klein ruimte gevange hou
voor boekrakke, portrette, notas en ’n Flexi PIII-komputer?
Dui die klou dan reeds die dier aan, soos VWL meen?
Of is daar geen onbewuste so ver of woes geleë as
van ’n digter nie net intertekstueel, maar ook letterlik, in transit?

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.