Swart villanelle

Ferdi Greyling

Die mure van die dag stort nou ineen.
Geen lig kan jou meer beskerm teen die nag.
Donkerte val neer oor die stad soos reën.

Huise, mense en alles van die dag
sink in die donker wat om jou vou.
Die mure van die dag stort nou ineen.

Die toe val van deure in hierdie nag
is dowwe klokke wat beier vir jou.
Donkerte val neer op die stad soos reën.

Woorde wat gister blink was in die dag
val vandag glansloos, dood en sonder krag.
Die mure van die dag stort nou ineen.

Geen maan of sterre tier in hierdie nag.
Diep in swart koue is jy nou gevou.
Donkerte val neer op die stad soos reën.

Oor die eens heldere stad van my dag
lê daar nou hierdie skadu van jou nag.
Die mure van die dag stort nou ineen.
Donkerte val neer op die stad soos reën.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.