die gevalle hostelbewoner

Kobus Faasen

jou lyf geknak soos ’n ou sowetan
hier waar jy lê
jou laaste stryd voltooi
(môre’s jy innie city press)
ennie tyre smeul nog
braaivleis, petrol, firestone
net nog ’n necklace geval
innie war zone
jou rooidoek, kenteken
vir die boere, nou ook as.
jou lewe het uitgebrand,
stuiptrekkend die gees gegee,
jou warlord in kwamadala wag,
sy hand op sy eikei,
sy impi’s gereed vir ’n aanval
deur die comrades vannie sdu,
hy sal wag vir die gedreun
van casspirs, blaf vannie honne
vir wit boere en askari’s,
koevoete, vreesloos en hard,

jou houvrou sal gaan soek,
uitvaar en -vra innie omgewing,
luister as die skote klap

die son wat deur die rookmis dring
sal môre die hostel wek
indoenakrete opklink deur die gange
dié wat werk het, voorberei
vir die roete vol gevaar
as die rooidoeke weer aantree
die strate dreun van hul oorlogslied
skilde kletter en skietgoed flits
die strydlus van voor af vlam

dan tiep jy nog
lê-lê jy diep
jou gees in ’n noodtoestand
en oor jou sterfterrein
sal kinders dan skool toe loop,
taxi’s mense werk toe ry

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.