Helene du Toit

Roetine

Vieruur verlaat ek die vier mure
van my vaal kantoor,
staan in die propvol hysbak
waar almal mekaar ongemerk dophou,
wag verveeld vir die bus,
verstik in die enjindampe
en soek die bekende bakens.
Strak gesigte klim op,
klim af,
die tannie wat haar pakkies vergeet,
die blymoedige vroutjie van Melville
- hoekom glimlag sy altyd?
Dan Wespark, Vyfdelaan-suid,
Linden, die garage in Agtstestraat
waar ’n groot vragmotor dwarsoor staan
en ons wag en wag.
Af in Derdelaan tot by die huis,
die woonstel wat gryswit wink
en stil vir my wag.
Later, voor die bedlampie kwyn,
lees ek van Ingrid en haar bitterbessietyd.
Dus, die finale konklusie van die dag:
bessiebos se takke is kaal in die winter
en wanneer die wag-’n-bietjiebessies groei
is dit bitter.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.