Huis

Carel Coetzee

“Dream but don’t make dreams your master.”

ek’t gedroom van ’n houtraamvensterhuis
       amper soos myne
vensters so groot soos die muur
waarin die tuin inkyk
boomvarings en lelies en varkoor
met die sagte geluid van water
wat vryf oor die gehoor,
ek’t gedroom van ’n oop huis
        amper soos myne
waar die vertrekke mekaar kan sien
asof mure ingesink het in die diepte van sy siel
waar noord en suid ’n eggo ver is
die dinge wat hy versamel het in sagte kleur
laat staan
om jou liggaam daarin te laat lê,
ek’t gedroom van waar hy slaap
geslote weggebêre in die hoek van sy tuin
selfs die badkamer het vensteroë
na ’n geheime plek
’n skepping van water en woud
en ’n hemelbed van stil satyn.

ons vertoef in huise
maar ons woon in mense.

maak ’n huis in jouself
want huise word geruk
deur aardbewings se wind
en tuine verstik
in strome van storms.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.