Kaggel

Carel Coetzee

partymaal as die temperatuur van hierdie seisoen my nader trek
aan die rooi gesigte van vlambeelde wat opkyk na die skoorsteen
binne die kaalte wat buite ons vensters strek
soos stamme blare reën

val my hart ook soms na die grond
bid ek na die vlamme van ’n ander man se oë
na ’n gevoel wat vlam vat aan die hart se lont
en pleit na die oorgee aan sy brandende vertoë

om ons lywe te verlig van kledingstuk of blaar
met net die molekules van hierdie winterlug wat ons skei
soos ’n maan deur ’n venster na jou kaal lyf te staar
totdat jy slaap in my arms as die nag ons bymekaar kry

so in oranje gloei waar ons lywe mekaar lees
is die naaste wat twee harte ooit aan mekaar kan kom
want in ons saamwees is daar ’n onvernietigbare alleenwees
ons lywe is steeds apart as die somer in die son opkom.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.