winter

Carel Coetzee

winter is ’n wolf wat verby ons vensters sluip
(die maan ’n bevrore dam in die hemel vanaand)
uit nêrens kom tjank en wasig inloer met ons ver
ver binne weggesluit van ontruimde strate en hemels
brand kaggels kole tamaties waaraan ons honger aan die hitte eet;
droom ek vanaand met my somervoorkop oop na die venster
verby die wolf wat in ons gesigte blaf met sy wit bek
verby die blink geyste stalaktiete van die takke
verby die bome wat lang beendere lyne aan die sfeer verleen
verby die wolkekrabbers wat grafstene in die mis staan versteen
verby die rook wat reusagtig ’n atoom-sampioen oor ons groei;
droom ek van voete wat my oor die maan laat skaats
sing-skree hadidas soos drake voor die oppervlak van die geyste
      maan
belig ons spoor oor gerypte aarde waar ons eens gestaan het —
en ek droom
van hoe warm die winter hier om my was
toe jy ook geleef het in my meubels, kamer en kas.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.