’n Beskrywing

Carel Coetzee

Hoe beskryf mens liefde
aan die kinders wat kaalvoet speel in Marthastraat
met gaterige klere en vuil monde wat skel oor die jaart,
aan die breë-skouer Drag Queens met duur rokke en arm oë
wat donker uitlag soos die eentonige ritme van die dansvloer,
aan die vrouens met die gelapte gesigte gebreek deur minnaars
     en mans,
aan die gays wat in Braamfontein hoog raak op pille om te vergeet
     van verhoudings,
aan hulle wat seks het met gesiglose mense in donker stegies,
aan die prostitute met glitter en sequins geplak oor hul gesigte
     soos die plakkate van flieks,
aan tieners soos verslaafde nimfomane met hul vingers op die
     internet se chatlines,
aan die ouerige vrouens met hande vasgeklem aan “Please
     Help”-kartondose,
aan die afbeenkinders in KwaZulu-Natal se somerson op
     suikerrietvlaktes,
aan die ou tannies wat wag om te gaan lê langs geliefdes by
     Wespark,
aan die mense wat hoop die komberse teen hul lyf vermenslik in
     arms soos ’n engel?

Hoe beskryf mens liefde
as die hart ’n rugsak geword het
en ons almal die lewe ronddra
soos ou bagasie?

Ek is my hele lewe al op reis
op soek na ’n manier
om te beskryf.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.