René Bohnen

Visioen

Iewers
in ’n skimland
in ’n tussen-in tyd
loop ek oor ’n graslose vlakte
in klam halflig en soek
na iemand bekends se koue lyk
om dit weg te dra na ’n warmer
plek as dié kil
ysveld waar swye spokerig
post-oorlog en post-hartklop lê.
Modder-pappery
strem die uitkenning;
belemmer die soektog na ’n enkele héél lyf
as ek omkyk
net toe ’n worstelende droomperd
probeer regop kom uit
die suigende moeras
van ys en flodder.
Die wit hings spartel
in doodsangs
bevange neusgate desperaat
wyd soos wonde sy donker oë
wild in asemnood en stryd
teen die ystyd
gletser-slik en slob
wat ons vasvang saam met skimmel
lyke menslywe
groen muf bevrore staar
die kouevuur al klaar vrot
neuse ore tone oogkaste
hol gangreen-grotte
wat hang in die bleek stilte.
In die klankdigte koue
beur hy
skielik ysvry
orent
en braak hewig -
die perdekopspuier
kots ’n silwer vis.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.