Wasdag

Andries Bezuidenhout

kyk, ek span ’n wasgoedlyn
tussen brixton en hillbrow
die torings as pale in die rotse geplant
geen dompkrag, hyskraan of helikopter
word toegelaat by dié projek nie
hierdie las neem ek op my lekeskouers
sonder die hulp van ingenieurs of bouers

ja, met my eie hande span ek hierdie lyn
met my eie arms absorbeer ek die pyn
maar van elke motoris vra ek ’n bydrae
by elke toeris kan ek my lot bekla
want daar’s smerige klere in hierdie geweste
bevuil met modder en pes, met snot en bloed

dus is hierdie torings die perfekte hoogte
vir ’n lyn wat tog met ’n lus kan swaai
waar die hoëveldwind vertroostend waai —
skoon van fabrieksrook, mynstof en roet
skoon van die oorlog wat daar onder woed

maar wag ...
eers moet ek hierdie lyn klaar span
want as jy klere was, moet jy dit iewers kan hang
iewers, hoog en droog — waar die son dit kan vang

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.