Dié poppe loop hulle lelik disnis

Cor Scholtz

Botspoppe
Belville Afrikaanse Teater
Deur: Nico Burger
Regie: Albert Maritz
Met: Johann Nel, Floyed de Vaal, en Nanette Nel op viool
21 tot 24 Julie 2004

Ek kan aan net een goeie ding dink om oor hierdie produksie te sê: Johann Nel se toneelspel beïndruk soos altyd. Dalk is die feit dat die stuk genadiglik net 'n uur lank is, ook iets wat ek kan byvoeg, maar dís 'n twyfelagtige pluimpie.

'n Skyfievertoning van die stadsprofiel van New York, die gebeure op 11 September 2001 en beelde van botspoppe ('n ongemaklike Afrikaanse nuutskepping vir crash test dummies) aan die begin stel die konteks waarin die drama afspeel en gee ook skynbaar 'n leidraad tot die eksistensiële kommentaar wat gelewer word op die toestand van die moderne mens. Sover lyk alles nog belowend.

Johann Nel vertolk die rol van Basil, 'n middeljarige, geskeide man hom wat ná 'n werkspartytjie (neem ek aan) die volgende oggend in sy kantoor bevind met 'n erge hangover. Wel, eintlik is Basil nog steeds dronk. Vermoedelik het hy wakkergeskrik van die slag van 'n gekaapte vliegtuig wat deur die venster bars.

Floyed de Vaal speel Basil se alter ego wat in dié se drankbenewelde weeklag ten aanskoue van die naderende einde 'n spastiese en irriterende klankbord is. Vir 'n uur lank moet die gehoor luister na Basil se gekerm oor sy ongelukkige kinderdae en verbroude huwelik met ene Gloria. Ongelukkig is die vent te vlak om met enigiets betekenisvol, oorspronklik of insiggewend vorendag te kom wat mens anders sou laat dink oor spyt, verspeelde geleenthede, intieme verhoudings, selfmoord of die dood.

Enigiemand wat al ooit nugter 'n dronklap se filosofering moes aanhoor, sal 'n idee hê waardeur hierdie teaterganger moes sit. Asof dit nie erg genoeg is nie, verskyn Nanette Nel elke dan en wan op die verhoog om bejammerende geluide uit haar viool te stryk wat alle grense van aanvaarbare sentimentaliteit oorskry. Om nie te praat van die musikale items waarmee die twee akteurs die groter gesanik mee artikuleer nie.

Ek lê die skuld vir hierdie sondes voor die deur van die teksskrywer en moet seker toegee dat die regisseur en die spelers hul bes gedoen het om bloed uit 'n crash test dummy te probeer tap. Ja, hier en daar is daar 'n goeie grappie en dit het gelyk asof die BAT-teater se gehoor tog van die stuk gehou het.

Dit spyt my dat ek nie 'n positiewe opinie oor Botspoppe kan skryf nie. Siende dat soveel stryders wakker lê oor die voortbestaan van die Afrikaanse teater, wil mens nie graag die oorsaak wees dat 'n enkele kaartjie onverkoop bly vir 'n produksie soos hierdie nie. Nadat ek egter soveel goeie dinge gehoor het van Albert Maritz se Maljan onder die hoenders was die teleurstelling net te groot.



LitNet: 30 Julie 2004

Stem jy saam? Stuur jou reaksies na webvoet@litnet.co.za om die gesprek verder te voer op SêNet, ons interaktiewe meningsruimte.

boontoe / to the top

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.