Die Sanlam/LitNet aanlyn-skryfskole

Via dolorosa

Lindy Worth

Eens
was die bos en veld
geborge, goed en stil
van onheil geen benul

Maar
iets het ver en weg gehurk
by spitspuntspoor en oggendmis
wat warm teen die winteraarde is

Eers toe die daglig duidelik maak:
Dít is die uur!
het hul beangs geraak

Was hul prewel
tussen fynhaaksade
'n bede om genade
om dié bitter beker weg te neem?

Tarentale het gesketter en skel
- voor hul in 'n stippelwolk verdwyn -
dat hul God(weet) hiervan sál vertel

Hoog in 'n kameeldoringkroon
het die langstertvoël sit en verloën:
Kwêêê …
ek wil nie sêêê …
ek wil nie sêêê …

*

… in rooibokoë
en in lyf
stol die dood
groen en skrikstyf …

Toe die Bosveld
sy houtskoolskets
teen 'n skemer horison ets
weet ek:

Dit ís volbring



LitNet: 03 Mei 2005

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.