Literêre "happenings" in Pretoria: Neerlandistiekprogram

13:00 Afsluiting

Let wel: Geen middagetereëling. Deelnemers kan gerus van die eetplekke op die kampus gebruik maak.

18:00-22:00
Skrywersdinee met Tom Lanoye en Joan Hambidge en wêreldpremière van Niel van der Watt se toonsettings van gedigte deur Tom Lanoye
Konferensiesentrum, Universiteit van Pretoria
Toegang: R100 per persoon, wat 'n driegangete insluit. Bespreek asseblief vooruit by een van die volgende persone:

• Renée Marais by 012 420 4592 of 083 304 1675 (e-pos: renee.marais@up.ac.za)
• Heinrich Grebe by 012 420 3075 (e-pos: heinrich.grebe@up.ac.za)
• Nerina Bosman (e-pos: nerina.bosman@up.ac.za)
• Neeltjie Celliers by 012 420 4075

Oor die deelnemers:

Die Nederlandse digter Mustafa Stitou is in 1974 in Tetouan, Marokko, gebore. Kort na sy geboorte verhuis sy gesin na Nederland, waar hulle aanvanklik in Lelystad woon. Toe hy 10 jaar oud is, trek hulle na Amsterdam, waar hy ook filosofie gestudeer het.

Hy debuteer in 1994 as negentienjarige met die bekroonde digbundel Mijn vormen, waarvan 2 500 eksemplare verkoop is. In 1998 verskyn sy tweede bundel, Mijn gedichten. Twee jaar later is albei bundels en die herdrukke uitverkoop, en word die twee bundels in 'n gesamentlike uitgawe gepubliseer. In 2003 verskyn sy derde digbundel, Varkensroze ansichten, wat met die prestigieuse VSB-poëziepryijs én die Jan Campert-prijs bekroon is. Die genietlikheid van sy poësie word geprys: "Stitou … geniet volop in zijn poëzie: van de taal, van zijn formuleringen, van zichzelf, van de wereld om hem heen en van zijn eigen plezier" (Rob Schouten in Vrij Nederland; aangehaal op www.vasallucci/nl/vassa/flappen/3079vormen.htm).

Stitou is poësieresensent vir Vrij Nederland en is bekend vir sy gereelde optredes as performer by literêre feeste in Nederland en daarbuite. Hy het ook deelgeneem aan verskillende interdissiplinêre projekte: hy het met die Scapino-balletgeselskap saamgewerk, en tekste vir stilfilmbeelde vir die Filmmuseum-biënnale geskryf.
Vir meer inligting, kliek op: www.kb.nl/kb/dichters/stitou/stitou-01.html.

Die Vlaamse skryfster Annelies Verbeke (geb 1976) is 'n draaiboek- en prosaskrywer en rubriekskrywer vir die maandblad Deng. Haar draaiboek Dogdreaming is in 2003 gekies vir die groot draaiboekwedstryd wat tydens die Berlynse Filmfees plaasvind. In dieselfde jaar verskyn haar debuutroman, Slaap, wat volgens die webwerf www.literairnederland.nl reeds tien drukke beleef en meer as 40 000 eksemplare in nege lande verkoop het. Die roman, oor 'n vrou wat aan slaaploosheid ly, is met vier verskillende pryse bekroon (die Vrouw & Kultuur Debuutprijs 2004; die Debuutprijs van het Vlaamse boekenvak 2004; het Gouden Ezelsoor; en die jaarlikse prys van die Grafische Cultuurstichting, 2005).

In 2004 het die kortfilm Romance van Douglas Boswell, met 'n draaiboek van Verbeke, sy première beleef en in 2005 het Victoria haar eerste kort toneelstuk, Troosteloos, opgevoer. In dieselfde jaar was sy en Annette Meyer een van die kunstenaarspare tydens ABC2004. Hier en daar is 'n kortverhaal van haar gepubliseer. Haar tweede roman, Reus, verskyn in Januarie 2006.

"'n Literêre popster" is hoe Tom Lanoye (geb. 1958) homself in 'n gesprek met Kirby van der Merwe (Insig, 2003) beskryf het. "Enfant terrible" is 'n etiket wat al deur ander om sy nek gehang is. Volgens Coen Peppelenbos (http://home.concepts-ict.nl/~coenp.lanoye.htm) is die vraag egter: Wie en wat is Tom Lanoye nié? Hy het die literêre toneel met groot fanfare betree, en is vandag ongetwyfeld een van die grootste en veelsydigste skrywers van sy generasie. Hy is digter, podiumdigter (performer), skrywer van outobiografiese prosa en fiksie (waaronder romansiklusse), dramaturg, kritikus, rubriekskrywer, kultuurfilosoof en die maker van 'n cd, The very best of the artist formerly known as a young man (1999).

Van vroeg af reeds het hy hom met identiteit besig gehou. In Kartonnen dozen (1991; in 1996 in Afrikaans vertaal deur Daniel Hugo) skryf hy oor sy eie identiteit; in Gespleten en bescheten (1998) oor die Belgiese identiteit. Laasgenoemde tema is groots uitgebou in 'n trilogie bestaande uit die romans Het goddelijk monster, Zwarte tranen en Boze tongen. Sy gedigte en vertalings oor die Eerste Wêreldoorlog, 'n oorlog wat feitlik die hele Wes-Vlaandere verwoes het, sluit ook op ontroerende wyse by die Belgiese identiteit en geskiedenis aan. Toonsettings deur Niel van der Watt van enkele van hierdie gedigte sal op 15 Oktober 'n wêreldpremière beleef.

Lanoye het intussen 'n wêreldburger met 'n welverdiende internasionale reputasie geword. Hy besit onder meer 'n huis in die Kaap, waar hy etlike maande van die jaar woon. Hier te lande is hy waarskynlik veral bekend vir sy toneelstuk Mamma Medea.

Joan Hambidge (geb 1956) is bekend as akademikus (verbonde aan die Universiteit van Kaapstad), teoretikus, en bekende literêre kritikus. Haar teoretiese bydraes handel veral oor Roland Barthes, dekonstruksie, postmodernisme, psigoanalise en metafiksie. In 1985 debuteer sy as digter, en sedert 1996 publiseer sy ook prosa. Haar omvattende oeuvre is met talle literêre pryse bekroon, waaronder die Eugène Marais-, die Litera- en die Poetry Institute of Africa-pryse.

Boekuitstallings word van 12 tot 15 Oktober in die Universiteit van Pretoria se Akademiese Inligtingsdiens en by Protea Boekwinkel in Burnettstraat, Hatfield aangebied, asook by die dinee op Saterdag 15 Oktober.

Bostaande program is moontlik gemaak danksy finansiële steun deur die Nederlandse Taalunie (via die Noordelike Kennisnetwerk vir Neerlandistiek), die Fonds Neerlandistiek Stellenbosch, en Protea Boekhuis.



LitNet: 10 Oktober 2005

terug    /     boontoe