Dr Riana Scheepers is gebore op 9 Desember 1957 in KwaZulu-Natal. Sy gaan skool by die Hoërskool Vryheid, waar sy in 1975 hoofmeisie is. Reeds op jong ouderdom wen sy verskeie pryse in poësie- en skryfkompetisies.
In 1976 begin sy haar studies aan die UOVS in Bloemfontein. Sy behaal die grade BA Kommunikasiekunde, BA Hons (Afrikaans en Nederlands), en MA (Afrikaans) - almal cum laude. In 1997 behaal sy 'n doktorsgraad in Afrikaans en Nederlands aan die Universiteit van Kaapstad. Sy word in 2000 aangestel as lid van die Suid-Afrikaanse Akademie vir Wetenskap en Kuns.
In 1988 aanvaar sy 'n pos as lektrise by die Universiteit van Zoeloeland. Haar eerste kortverhaalbundel, Die ding in die vuur, wat gaan oor die leefwêreld van die Zoeloes, word hier geskryf, asook 'n groot gedeelte van haar tweede bundel, Dulle Griet.
Haar eerste kortverhaalbundel, Die ding in die vuur, is in 1991 bekroon met die ATKV-Prosaprys en die FAK-prys. Haar tweede bundel, Dulle Griet, het in 1992 die Akademie vir Wetenskap en Kuns se Eugène Marais-prys verower.
In 1990 aanvaar sy 'n pos as lektrise by die Universiteit van Kaapstad, en in 1995 sluit sy haar by Tafelberg Uitgewers as skakelredakteur aan. In 1999 aanvaar sy 'n onderwyspos by Paul Roos Gimnasium in Stellenbosch en begin die Skool vir Skryfkuns en Kreatiewe Denke. Sedert 2002 is sy voltyds skrywer.
Haar publikasies 'n Huis met drie en 'n half stories van 1994 (kortverhale) en Die heidendogters jubel van 1995 (roman) is beide binne een maand herdruk. Haar drie bundels "kombuisverhale", Haai Katriena, wat vertel jy my nou!, Katriena, nou lieg jy mos! en Katriena, néé! was blitsverkopers. In 1997 verskyn 'n bloemlesing verhale waarvan sy samesteller is, getiteld Dogters van Afrika. Feeks, 'n bundel kortverhale, verskyn in Oktober 1999 en in Maart 2000 in Nederlandse vertaling. In 2001 verskyn haar eerste jeugroman, Blinde sambok, asook haar eerste digbundel, Met die taal van karmosyn. Blinde sambok word in 2003 bekroon met die ATKV Kinderboek-prys (Kategorie 10-12 jaar).
|
