Kortlys van Via Afrika se literêre pryse aangekondig

Persverklaring deur Via Afrika

Die kortlys van Via Afrika se literêre pryse, wat tot die land se belangrikstes gereken word, is pas bekend gemaak. Die totale waarde van die ses pryse, waarvan een in oorleg met Rapport aangebied word, is R140 000. Die wenners sal op 14 Junie by 'n glansgeleentheid in Kaapstad aangekondig word.

Die pryse - die WA Hofmeyr-, Recht Malan-, MER- (2), Herman Charles Bosman- en Jan Rabie/Rapport-prys – word toegeken aan skrywers wat in die voorafgaande kalenderjaar by die verskillende uitgewerye van Via Afrika gepubliseer het. Die beoordelaars het in die geval van elk van hierdie pryse 'n kortlys van drie skrywers opgestel.

In die geval van die WA Hofmeyr-prys, wat reeds in 1953 ingestel is en onder vorige ontvangers daarvan ook NP van Wyk Louw en DJ Opperman tel, bestaan die kortlys uit Marlene van Niekerk (Agaat), Antjie Krog (Die sterre sê 'tsau') en Jan van Tonder (Roepman).

Agaat

Die sterre sê 'tsau'

Roepman

Agaat volg op Van Niekerk se roman Triomf en ondersoek die plaaswêreld op dieselfde vernuwende wyse as wat sy in laasgenoemde met die stadsroman gedoen het; Die sterre sê 'tsau' is 'n herdigting deur Antjie Krog van San-verse wat Wilhelm Bleek en Lucy Lloyd in die 19de eeu opgeteken het; terwyl Roepman hom afspeel in 'n spoorweg- gemeenskap in die sestigerjare, soos gesien deur die oë van 'n dertienjarige seun.

Vir die Recht Malan-prys vir nie-fiksie - Malan was in die sewentigerjare voorsitter van die ou Nasionale Pers-direksie - is die volgende skrywers benoem: J C Steyn vir sy Die Honderd Jaar van MER, Uma Dhupelia-Mesthrie se Ghandi's prisoner en Willemien le Roux en Alison White se Voices of the San.

Die Honderd Jaar van MER

Ghandi's prisoner

Voices of the San

Die Herman Charles Bosman-prys vir skeppende en outobiografiese werke in Engels is in 1997 ingestel om een van die land se mees gelese Engelse skrywers te vereer. Die drie skrywers wat vir hiervoor gekortlys is, is William Dicey vir Borderline, Helmut Bertelsmann vir So anyway, en Keorapetse Kgositsile vir This way I salute you.

Borderline

So anyway

This way I salute you

Die MER-prys vir kinder- en jeuglektuur, wat in 1984 die eerste keer toegeken is en toe aan Alba Bouwer, is verlede jaar in twee verdeel om afsonderlike pryse vir kinder- en jeuglektuur te skep. Die drie skrywers wat vir die kinderboekprys benoem is, is Wynand Louw (Mr Humperdinck's wonderful whatsit), Niki Daly (Eenmaal lank gelede) en Piet Grobler en Maria Hendriks (Makwelane en die krokodil); en vir die kategorie vir jeuglektuur, Martie Preller vir Die Hart van Zeebak, Jenny Robson vir Savannah 2116 en Anoeschka von Meck vir Vaselintjie.

Mr Humperdinck's wonderful whatsit

Eenmaal lank gelede

Makwelane en die krokodil

Die Hart van Zeebak

Savannah 2116

Vaselinetjie

Von Meck is ook een van die twee skrywers wat benoem is vir die Jan Rabie/Rapport-prys, die ander synde Winnie Rust vir Martha - 'n Verhaal oor Martha Solomons, Countess of Stamford. Die prys is ingestel as hulde aan Rabie, die groot voorloper van Sestig, om erkenning te gee aan die innoverende ontginning in Afrikaans van nuwe terreine van die prosa.

Vaselinetjie

Martha

boontoe / to the top

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.