Don’t leave me this way

Joan Hambidge

As jy weggaan,
moet jy niks agterlaat nie:
nie jou maskara,
handeroom,
of sonbril.

Jy moet my volledig verlaat.
Ek soek geen herinnering
soos ’n boekmerk in ’n halfgelese roman
of ’n vingerafdruk op ’n ruit.

Jy moet gaan
asof jy nooit daar was nie.
So as ons mekaar weer sien
(jy met ’n nuwe minnares of man)
moet ons soos ónbekendes groet:

ek wil jou van nuuts takseer,
my blik op jou gooi
en wonder
of jy hou van ’n “one night-stand”?

Maak jy jou mooi oë toe
of kyk jy na jou minnares
se borste, naeltjie en dye?
Slaap jy knus in haar arms?

Al hierdie bespiegeling, vrae
is oorbodig, lieflingskat.
Kom ons vergeet van gister
en veral van more …

Kom ons raak weer
vir ’n oomblik handgemeen
en laat ons tonge flits
in hierdie hartstogspel
van ontmoeting-ontdekking

en ten slotte: onttrekking.

boontoe / to the top

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.