Lettie-blues

Joan Hambidge

Sy staan manhaftig
in die kroeg
met twee speelgoedrewolwers
op haar heupe,
brandy-en-coke in die hand.
Sy is die snoekerkoningin
en met darts gooi
sy maklik ’n bull’s-eye
sonder om ’n spier te rek
en net gister het sy as mechanic
haar kar se enjin opgetjek.
Sy is ’n eunug,
al kan sy al die regte mangoed doen
soos drink en darts en fight.
Vanoggend het haar girlfriend,
’n verpleegster by Brackenfell,
haar gelos vir ’n regte man
en ’n opgewarmde Cortina.
“Jy sal nog spyt kry,” het sy gegil
en amper die bliksem
se kakebeen gebreek.
Sy maak of dit haar nie raak
nie. Daar is baie visse
in die see. Soos die stafverpleegster
wat op “Dancing Queen” boogie-woogie.
Sy weet hoe haar binnegoeters werk:
sjokolade, blomme
en tender loving care,
altyd altyd in beheer,
tot die tande toe gewapen
met ’n kwinkslag en gebalde vuis.
Dis net dis net
haar hart is so sag
so teer
soos ’n olyf
sonder pit.

boontoe / to the top

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.