Punks (2000)

Met: Seth Gilliam (Marcus); Dwight Ewell (Hill); Rockmond Dunbar (Darby); Jazzmun (Chris); Renoly Santiago (Dante); Loretta Devine (Gesondheidsraadgeefster); Vanessa Williams (Jennifer); Rudolf Martin (Gilbert)
Draaiboek en regie: Patrik-Ian Polk

Om ’n hele handvol redes herinner hierdie fliek aan ’n ander fliek van die Gay en Lesbiese filmfees, The broken hearts club: albei handel om ’n groep gay vriende in Los Angeles; albei hoofkarakters is jong fotograwe wat hulself verweer teen die aanslae van die liefde. En tog is daar deurslaggewende verskille.

Die titel Punks beklemtoon die eerste verskil: dit gaan hier omtrent ’n minderheid binne ’n minderheid, naamlik swart gay mans. En een van die groep vriende is lid van ’n derdevlakminderheid: die swart “drag queen”-kultuur. (Hierdie karakter, Chris, veroorsaak natuurlik dat kykers vergas word met die skouspelagtigste kostuums sedert die woestynkoningin Priscilla haar passies oor ons skerms gemaak het!) Hoewel die kwessie van swart wees in die prent ter sprake kom, word dit nie werklik diepgaande belig nie: die verhaal is — soos The broken hearts club — verstrooiingsvermaak: om te veel daarvan te vertel, is sinloos. Dis genoeg om te sê dat die ontwikkeling van verhoudings, verraad en vriendskap die ruggraat van die vertelling vorm. Maar dan met heelwat meer hart en siel as die bleeksielprent vroeër genoem!

’n Mens begin wonder waarom The broken hearts in Suid-Afrika versprei gaan word en Punks (voorlopig) nie. Maar dis dalk beter om verspreiders se beweegredes nie te ernstig te bevraagteken nie, en dankbaar te wees dat Out in Africa prente soos hierdie hier kan kom vertoon.

Punks is blykbaar op ’n baie klein begroting gemaak, en tog word al die basiese bestanddele so gladgelek saamgevoeg dat dit nie na afskeepwerk lyk nie. Soos reeds gesuggereer, is dit nie diepsinnige filmkuns nie, maar beslis goeie vermaak.

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.