Hennie Aucamp is ’n veelbekroonde skrywer en samesteller. ’n Bundel opdragkwatryne, Koerier, verskyn eersdaags asook ’n versameling van sy liedtekste, Lyflied, saamgestel deur Daniel Hugo. Hy woon in Tamboerskloof, Kaapstad. Lees meer oor dié skrywer Nog kortverhale deur Hennie Aucamp: Die verlore vader

Watteau

Die hele ding het in ’n droom tot my gekom en daarom sal dit wel waar wees.
    Ek droom ek reis deur die land met ’n slank, bleek man in my geselskap; ’n Europeër op besoek.
    In die motor speel hy met iets wat hy iewers opgetel het.
    ’n Veer, sê ek wysneusig.
    ’n Varing, sê die Europeër koppig.
    ’n Varing sou al lankal verwelk het, kap ek teë.
    ’n Veer is nie groen nie, sê die Europeër.
    Die ding wat ’n veer is maar nes ’n varing lyk, word ’n twispunt tussen ons, en om verdere onaangenaamheid te vermy, gaan ons na my mentor, ’n verstandige ou man, en vra hom om uitsluitsel te gee.
    Die verstandige ou man is baie ernstig omtrent ons probleem.
    Daar is maar één toets, sê hy, plant hom. Maar julle moet die grond deeglik verryk, met eie bloed en saad.
    Toe ons tuis kom, bevrug ons die grond en plant die groen veer.
    En kyk, die veer gee lote af; en die veer word ’n varingbos, met spore onder elke blaar. Die Europeër doop die varingbos Watteau, en ek aanvaar die naam, al weet ek nie mooi wat dit beteken nie.
    En Watteau gedy, selfs ná die Europeër vertrek het.
    Maar op ’n dag hou die Europeër op met skryf aan my, en waneer ek hom bel, is daar nie antwoord nie.
    Ek hoef nie tuin toe te gaan nie, want ek weet al klaar wat ek sal sien: ’n varingbos wat gekrimp het tot ’n veer.

boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.