Desnieteenstaande: ’n Uur se puik vermaak
Braam van der Vyver
Desnieteenstaande is ’n satiriese verhoogstuk uit die pen van Jeanne Goosen, en is pas opgevoer tydens die KKNK. Om na Jeanne as ’n deurwinterde skryfster te verwys is ’n understatement. Haar jarelange ondervinding het sy opgedoen in elke sosiale sfeer: van die hoogste tot die minder gegoedes. Sy kén mense.
Hierdie nuwe verhoogstuk van haar is juis gebore uit haar diepgaande mensekennis. Henrietta Gryffenberg speel die rol van die eksvrou van advokaat Japie Combrink. Die mevroutjie het al voor die egskeiding die bicycle se handles gelos en haar oorgegee aan alle vorme van lyflike plesier. Volgens die advokaat het sy ’n seksuele voorkeur vir loodgieters en ander bloukraagwerkers ontwikkel, maar dis nie al nie. Hierdie drange word verder gestimuleer deur haar oordadige drinkgewoontes.
Om haar in haar kwaad te sterk is daar haar Engelse vriendin, gespeel deur Liz Meiring. Dié vriendin, wat glo dat die wêreld om kontakte draai, kyk self graag besonder diep in die bottel. Meiring, wat soos ’n handskoen in die rol pas, lewer skitterende spel.
Om sake verder te kompliseer is daar nog die Combrinks se wash-out van ’n seun. Justin Strydom, wat die rol van beide advokaat Combrink en die seun speel, is behoorlik op sy stukke.
Wanneer advokaat Strydom in ’n geskilletjie met sy eks omkom, word die twee suipende vroue gedwing om hulle grysstof te gebruik.
Die storie is so oud soos die berge, maar dit keer nie vir Goosen om dit in ’n sprankelende satire te omskep nie.
Voeg drie van ons land se voorste komiese akteurs op die verhoog by ’n teks uit die pen van die oudste jakkals en siedaar: ’n uur se puik vermaak vir die gehoor.
LitNet: 15 April 2004
Wil jy reageer op hierdie artikel? Stuur kommentaar na webvoet@litnet.co.za om die gesprek verder te voer op SêNet, ons interaktiewe meningsruimte.
boontoe / to the top
|
