Lucas Malan

Houtbos

Ons Pa het dit soms uit die bloute goed gedink
— Sussie onthou jy dit? — om die twee van ons,
wat die jongste was, by sy ou lorrie se santekraam
te laai as hy Bos toe gaan. Altyd eers na jou geroep:
“Dolla! Waar is julle? Kom jong; kom ry gou saam —”
Haastig ’n laaste koffie gedrink, buite iets opgeraap,
ingespring, met ’n lawaai die ou Fargo in rat gekry
en uit die werf laat krink. (Ons was nog half skaam
vir dié outydse ding met sy dawerende bak vol skraap-
en kneusplekke — maar wat, hy’t ons daar gebring)

By Sovenga verby, en by Boyen daarna, met naboom
en aalwyn alkant het ons drie gery, plek-plek gekruip
in nat klowe boontoe, waar dit die ene swamgewas ruik —

Vreemd genoeg het die vraag nooit tóé by my opgeduik
of so iets gevaarlik kan wees nie. Eers later, in ’n droom
het ek die wond in die bos gesien — en die gevélde boom

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.