Aan die einde van die reënboog

Joan Hambidge

Ek lê
in die opgefrommelde lakens
van jou dubbelbed
verrinneweer
deur die stilswye,
die gebrek aan begrip,
die verbymekaarpraat.
Jy staan voor jou kas
in jou deurtrekker
jou mooi peerboude
ginnegaap begeerte.
Ons maak nie meer liefde nie.
Dis dood tussen ons
op die Sealy Posturepedic.
Jy staan nie meer op jou knieë nie,
nee, nie meer nie.
Snags draai jy jou rug op my
en my woordelose toenaderings.
Jy dink ek weet nie
jy is klaar met my nie.
Jy laat sy kaartjie in jou motor
oop en bloot. En ek?
Hou jou dop,
weet my lyf
is die probleem:
“real women have curves”,
teugend aan ’n Camel filter
in ons oorlogsbed.
Jy, die Amasone,
ek, ’n latter-day Osiris.
Op ’n tyd sou jy Isis wees,
my terugwen
vir die spel
van opmaak-uitmaak.
Vanoggend is my lyf ’n lyk.
Om my groottoon: “Dood aan
hartstogsgebrek.”
Jy trek die gordyne oop,
the show is over.
Ek glo nie meer
aan die pot goud
of die reënboog nie.

boontoe / to the top

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.