Die Sanlam/LitNet aanlyn-skryfskole

Jou kind

Riana Wiechers

(’n Herskrywing van “Die Kind” in opdrag vir 'n onlangse Ingrid Jonkerherdenkingsaand)

jou kind word nie groot nie
jou kind lig dun hande teen die skyn van jou aanwesigheid
wat haar kindername fluister    skreeu die eggo’s
van kanker en verbetenheid
in die magteloosheid van ‘n sterwende hart

jou kind vou haar hande teen jou tere aanslae
en die wegbleik van jou              herinnering
wat jou nederlaag skreeu            skreeu die leemte
van onvoorwaardelike liefde       en vrede
in die doodloopstrate van haar ontouerde trots

maar jou kind word nie groot nie
nog in Hofstraat nog in Vredehoek
nog in ‘n beige huis in Durbanville
nog onder aanklag van wit lakens
waar sy bloei met ‘n boek deur haar smart

jou kind is jou lyf se skynherrysing
op wag met ‘n glimlag wat sê dis oukei
jou kind is teenwoordig by begrafnisse en familiebyeenkomste
jou kind hoor deur klanke van jammerte    en die oë van die wat oorbly
jou kind wat net wil deel wees      (in afwesigheid van weesheid)       dryf nêrens
jou kind stom     en woedend        plof terug in haarself        en in wyn
jou kind stuip-inkrimpend bly op een plek verdwyn             en verskyn

sonder ‘n ma

LitNet: 14 November 2005

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.