Skryf in die algemeen

Skryf is in die eerste plek die soek na ’n geskikte invalshoek: is dié daar, kom woorde vanself.

Weg-skryf van jouself af kan net so ’n effektiewe terapie wees as uit-skryf uit jou verknoopte derms uit.

’n Totale gemoedsomkeer gebeur selde by die gewone mens; in dramas wel, by karakters, en dan ook net as tegniese noodsaak.

Verwarrende woord in die literêre bedryf: ontknoping. Wat in die laaste akte of die laaste paragrawe gebeur, is juis ’n bymekaarbring en saambind van baie drade en geen ont-knoping nie.

Dis nie dat skrywers noodwendig meer raak sien as ander mense nie. Dis net dat hul sensors onderontwikkel is, en hulle alles oorvertel wat hulle sien.

Daar is glo ’n verwantskap tussen reeksmoordenaars en skrywers wat chronies publiseer. Wie, in die geval van skrywers, is die prooi: die teks of die publiek?

Wanneer ’n skrywer se waaksaamheid verslap, dring woorde soos die volgende by sy taal in: “onvergeetlik”, “onvoorstelbaar”, “onbeskryflik”.

Ware moderniteit is blywend — die groot skrywers van die verlede is nog altyd ons tydgenote.

boontoe / to the top

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.