Groot Kunstefees- en Teaterindaba

Moontlik gemaak deur/Supported by:

Jean Meiring

Klik hier vir die program!

Klassieke Klanke: Chinese tenoor op CD

Mozart 'n Tourette-lyer

Skryf vir ons/ Write to us: webvoet@litnet.co.za

Ten slotte

En daarmee is LitNet se eerste Kunstefees- en Teaterindaba afgesluit. Enige verdere bydraes is natuurlik erg welkom en sal by die huidige bondel insette gevoeg word. Hierdie is immers nie 'n gesprek wat binne die vier virtuele mure van 'n webwerf kan bly nie. Hopelik sal dit by volgende jaar se kunstefeeste weer aan die gang gesit word. Die hemele weet, dis 'n nodige debat.

Vir die 21 deelnemers wat dikwels onder moeilike omstandighede - en teen geen vergoeding - hul heel verkwiklike bydraes gepen het, baie dankie. Weer: baie dankie. Die gesigspunte wat gestel is, is verhelderend. Mens mag dalk geensins nader aan 'n oplossing wees nie, maar ek meen tog dat die vernaamste probleme wel skerp omlyn is.

In wese is dit die oerekonomiese probleem van baie mense wat elk op 'n deeltjie van 'n al skaarser wordende voorraad kommoditeite aanspraak maak. Elke kunstenaar en entertainer wil 'n vol saal trek en sodoende met 'n vol beursie huis toe gaan. Werk in die bedryf buite die kunstefeeskringloop is tot 'n klein groepie blinkgepoetste sepie-sikspense beperk. Vir die meerderheid akteurs en regisseurs is daar andersins weinig kans op oorlewing.

Opvoeding, visionêre programmering, insigverbredende kunstejoernalistiek en 'n staande toneelgeselskap is maar vier van die oplossings wat in die gang van die gesprek ter tafel gebring is. Die kunstepolitici sal in die jare wat voorlê, 'n nuwe bedeling moet beding. Anders is alles gras.

In die loop van die organisering vooraf en gedurende die indaba self was daar 'n gevaarlike mate van wanhoop te bespeur. 'n Regisseur wat aanvanklik tentatiewerig onderneem het om deel te neem het ter elfder ure gesê: nee, die hele affêre is vir hom nét te deprimerend. Hoe die kunstegemeenskap op die yl aalmoese wat hulle gegun word, oorleef, weet nugter alleen. Van waar hulle die volgehoue drif en moed vind om met hulle selfontblotende, moeilike werk voort te gaan, is vir baie van ons duister.

Ek hoop daar het iéts hieruit gekom.

Dankie ook aan die borge, sonder wie die gesprek nie sou kon plaasvind nie: hoofborg Sanlam; Aardklop; die KKNK; mediavennote Beeld en Volksblad. Ook aan die Dorpstraat Teater Café.

En aan Erns Grundling, wat 'n reusetaak verrig het en sonder wie se onvermoeide ywer dit nie moontlik was nie.

Dank ook aan Zani Botes en Etienne van Heerden. En aan Nicky Grieshaber, wat soms onder groot druk moes proeflees.

Tot sover.

Jean Meiring



LitNet: 19 November 2004

Have your say! To comment on this piece write to webvoet@litnet.co.za, and become a part of our interactive opinion page.

Wil jy reageer op hierdie artikel? Stuur kommentaar na webvoet@litnet.co.za om die gesprek verder te voer op SêNet, ons interaktiewe meningsruimte.

boontoe / to the top

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.