Pharos Speller: Speltoetser en woordafbreker vir Afrikaans

Dis toe ek die laaste punt lees dat my nekhare almal gaan regop staan van verontwaardiging — of was dit maar net van onsekerheid? In ieder geval, ek druk die knoppie om my rekenaar se CD-drywer oop te maak, klik die CD-Rom-kassie oop en is eerstens verbaas oor hoe maklik die CD uit sy bedjie gelig kan word. (Met my onhandige vingers buig ek gewoonlik ’n musiek-CD omtrent dubbel voor ek dit verlos kry van die plastiekring in die middel!) Ek lê hom eerbiedig in die aandrywer se “koffiebekerhouer” neer, en siedaar, die ding neem sy loop en ek hoef net hier en daar ’n klik met die muis te maak. Die installering is toe voorwaar so maklik as wat beloof is.

En as mens oor ’n koppie tee deur die ingeslote handleiding lees, kom jy agter dis presies net so maklik om te gebruik as die ingeboude Engelse woordeboeke in Word. As mens dié implemente dus reeds voorheen gebruik het, is die hantering van die Afrikaanse speltoetser voor die hand liggend.

Volgens die handleiding kan mens allerhande eie leggers skep waarin jy woorde bewaar wat jy self dikwels gebruik, onder andere byvoorbeeld ’n legger waarin jy kollegas of vrinne se eiename kan bewaar sodat ook dié outomaties gekorrigeer kan word wanneer jy aan hulle skryf — sou jy die outomatiese speltoetser-opsie kies. Maar vir my lekegemoed het dit net na ’n aksie te veel moeite vir eie gebruik gelyk, en ek gebruik die Speltoetser nou al die afgelope vyf maande met groot vreugde sonder dié funksie.

Enigste jammerte vir my, ’n taalpraktisyn wat met ’n baie wye verskeidenheid dokumente in Afrikaans werk, is dat die korpus van ’n kwartmiljoen woorde nie heeltemal so omvattend is as wat mens graag sou wou glo nie. Maar ek voeg daagliks met min moeite woorde by die bestaande lys, en siedaar: die Pharos Speller is my jongste beste vrind!

boontoe