Boekenuus deur Annelie Ferreira

Jade is ’n Afrikaanse medisynevrou wat vir haar eie genesingsproses teruggegaan het na haar Europees-paganistiese wortels. Dis ’n baie aardse spiritualiteit wat in hierdie boek gestalte kry, ’n soeke na die herstel van die vroulike beginsel in die wêreld. Dit gaan vir Jade om sowel die herstel van vroue se verhouding met hul liggame as instrumente van spiritualiteit en “majiek”, as die mens se verhouding met die aarde as oermoederlike liggaam.

“Oerflenters wysheid” — als in eerlike Afrikaans. ’n Dapper boek.

Prys R120. Bestel by jade@spinnerak.co.za.

Net vir almal

Ek skat dat hierdie boek deur meer vroue as mans gelees sal word. Christina kyk op ’n vars manier na verskillende soorte verhoudings in die Bybel — mnr en mev Lot, mnr en mev Noag, en nog vele ander — om die beginsels van gesonde verhoudings te illustreer. Haar aanslag is lig, met ’n lekker aweregse sin vir humor. (Die kommunikasie tussen Adam en Eva was byvoorbeeld maar treurig, sê sy, om nie te praat van die seks nie, ten minste terwyl die tweetjies nog in die paradys was ...)

Maar onder die ligtheid is daar ’n egte strewe (soos by Jade, al kom die twee skryfsters van uiteenlopende hoeke) om stukkende mense te help heelmaak.

Prys R89,95

Hierdie boek, oor die siekte en dood van die skryfster se man Derik, het reeds ’n jaar gelede verskyn, maar ek noem dit graag hier, omdat Marthie so eerlik en met soveel gevoel skryf oor die maniere waarop mense deel word van mekaar, en ook afskeid neem van mekaar. Die verhaal getuig van deurleefdheid (geen maklike antwoorde of uitkomste nie) en ’n geslaagde versoening van spiritualiteit en aardsheid. Die impak van ’n geliefde se terminale siekte word met openheid vertel, en word ’n ontdekkingsreis waardeur ook die leser groei.

Prys R84

Wat’s die storie met die kerk? vra, soos die titel aandui, na die rol van die kerk in die hedendaagse Afrikaanse samelewing. Dis ’n baie sinvolle vraag in die lig van die groot mate van ontnugtering wat baie mense beleef het met die kerk, en onsekerheid by ander omdat dinge te vinnig vir hul gemoedsrus verander. Andries se grootste pleidooi is om begrip vir die feit dat “die kerk” menslik is, soos alle menslike instansies foute maak, maar nie vir altyd hulle foute hoef te wees nie.

Hy skryf met besondere deernis, humor en insig.

Prys R49,95
Bestel by: 0860 231 231

Net vir slimmes

Darem nie só erg nie, maar dit is so dat jy sterk sal steun op jou linkerbrein wanneer jy hierdie boek oopslaan. Drr Newberg en D’Aquili het met behulp van gesofistikeerde tegnologie jare lank navorsing gedoen oor hoe spirituele ervarings soos meditasie en gebed mense se breinfunksie beïnvloed. Hul bevindings het bygedra tot die ontwikkeling van die “neuroteologie”, ’n dissipline wat die verband tussen spiritualiteit en breinfunksie ondersoek. Die godsdienstige impuls, meen hulle, is deel van die biologie van die brein — “God is hardwired into the brain.”

Prys R230

boontoe / to the top