Welcome to the Hotel California

Joan Hambidge

Gisternag ontmoet ons weer
astraal
iewers by ’n buitelugkafee.
Ons praat
in die hoorbare stiltes
van ’n droom.
’n Boodskapper
berig
ons liefdeshotel het afgebrand:
daardie hotel waar ons eens
mekaar verken het in ’n kamer
met oop vensters, ’n patio
en ’n seebries. Later keer hy terug:
nee, die hotel is nie in puin.
Hy is jou eggenoot, die een
aan wie jy wettiglik behoort:
ons naam staan in die hotelregister.
’n Foto van jou in ’n vyfster-kamerjas,
jou borste soos twee ribbokke,
op ’n ander een kyk jy verby my
asof jy my nie sien nie. ’n Derde
foto flits ’n donker vag
waarna ek skaamteloos staar.
Herinneringe van ons eertydse liefde
word nie deur die vuurtonge
van afsegging, misverstand of verwyt
verwoes nie.
Die sissende kole van jou stilte,
die vlammende vure van my verse ten spyt.

boontoe / to the top

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.